( သန်ကောင်၊ တုတ်ကောင် ရောဂါ)
မိုးရာသီတွင် လှိုင်လှိုင်ပေါများ သီးပွင့်လာကြသော ရာသီစာများဖြစ်ကြသည့် ပိန္နဲသီး၊ သရက်သီး၊ မရမ်းသီး၊ ကနစိုးသီး စသည့် အအေးစာများနဲ့ အမှည့်လွန်စာများကို စားသင့်သည်ထက် ပိုမိုစားမိခြင်း၊ မိုးရေအထိများခြင်း၊ အအေးမိခြင်း၊ အစားအသောက်များ မသန့်ရှင်းခြင်း၊ အစာမကြေ လေပွခြင်း၊ မသန့်ရှင်း မစင်ကြယ်သော လက်များကြောင့် သန်ကောင်၊ တုတ်ကောင်များ စတင် အခြေစိုက်ရာအဖြစ်ကို ဖြစ်စေလေသည်။
(ရှေ့ပြေးလက္ခဏာများ)
အသားအရေ ဖြူဖပ်ဖြူရော်ဖြစ်စေပြီး မျက်နှာဝါခြင်း၊ မျက်ကွင်းညိုတတ်ခြင်း၊ ၀မ်း၏အရောင်မှာ ဖြူဖွေးပြီး အစာမကြေဘဲ ၀မ်းခဏခဏ သွားလေ့ရှိခြင်း၊ ၀မ်းဗိုက်ထဲမှာ နာကျင်ပြီး ရောင်ရမ်းနေတတ်ခြင်း၊ ခန္ဓာကိုယ်မှာ တဖြည်းဖြည်း ပိန်ချုံးလာစေခြင်း၊ ၀မ်းဗိုက်ပူလာကာ ရွှင်လန်းမှုမရှိတော့ခြင်း စသည့် လက္ခဏာများကို ကလေးသူငယ်များတွင် စတင်တွေ့ရှိတတ်ကြပါတယ်။ ဒီလိုလက္ခဏာတွေက အများအားဖြင့် သန်ကောင် တုတ်ကောင်ရောဂါတွေနဲ့ ပတ်သက်တတ်ပါတယ်။
( ကန်းမာရေးဝန်ကြီးဌာန၊ တိုင်းရင်းဆေးပညာ ဦးစီးဌာန၊ သုတေသနနှင့် ဖွံ့ဖြိုးရေးဌာန၊ တိုင်းရင်းဆေးခန်းသုံး ဆေးများ ကုထုံး)
သန်ကောင်၊ တုတ်ကောင်တွေအတွက် ရိုးရာအိမ်သုံးဆေးနည်းတွေ အချို့ရှိတတ်ကြပါတယ်။ ဒီဆေးနည်းလေးတွေရဲ့ အကြောင်းကိုတော့ ဒီဆောင်းပါးမှာ ထည့်သွင်းမဖော်ပြတော့ဘဲ တိုင်းရင်းဆေးခန်းသုံး ဆေးနည်းတွေအကြောင်းကိုပဲ ဆက်လက်ပြီး ရေးသား တင်ပြပါမယ်။
ပထမဆုံးအသုံးပြုသင့်တဲ့ ဆေးနည်းတနည်းကို ဖော်ပြရမယ်ဆိုရင်တော့ တိုင်းရင်းဆေးခန်းသုံး ဆေးအမှတ်စဉ်(၂၅)၊ မတဲမြင့်မိုရ်ကုန်း ဆေးပဲဖြစ်ပါတယ်။
ဒီဆေးကိုတော့ ကလေးအတွက် ဆေးတခွက်စာပမာဏ တကြိမ်တိုက်ကျွေးရန် တပဲသားခန့်ကို တနေ့ကို သုံးကြိမ်အထိ တိုက်ကျွေးပေးနိုင်ပါတယ်။
ဒုတိယတိုက်ကျွေးပေးနိုင်တဲ့ တိုင်းရင်းဆေးခန်း ဆေးအမှတ်ကတော့(၃၅)ဖြစ်ပါတယ်။ ဆေးအမည်က ဇာတိဝင်္ဂ ဆေးပါပဲ။
ကလေးအတွက် ဆေးတကြိမ်စာ ဆေးတခွက်စာအနေနဲ့ ဆေးမှုန့်တပဲသားကို ရေနွေးပူပူကလေးနဲ့ တနေ့ကို သုံးကြိမ် တိုက်ကျွေးပေးနိုင်ပါတယ်။ ဆေးကိုတော့ သုံးရက်ဆက်တိုက် တိုက်ကျွေးရန် သတိထားပြီး ပြုစုကုသသင့်ပါတယ်။
ခုနစ်ပါးဆေးဝါးလေ တိုင်းရင်းဆေးခန်း ဆေးအမှတ်(၄၇)ကို ရွေးကြီးတရွေးမှ သုံးရွေးအထိ တိုက်ကျွေးပေးနိုင်ပါတယ်။ ကိုယ်ပူကျစေရန် လိမ်းဆေးအနေနဲ့ ဒီခုနစ်ပါးဆေးဝါးလေကိုပဲ ဆေးတရွေးခန့်ကို သနပ်ခါးရည်ကျဲကျဲကလေးနဲ့ ဖျော်စပ်ပြီး လိမ်းပေးပါ။ စောင်ပါးပါးကလေးကို ခြုံစေပြီး လေလုံရာမှာ နေထိုင်စေသင့်ပါတယ်။
ကလေးအနေနဲ့ ကိုယ်ပူတတ်ခြင်း၊ အင်အားကုန်ခန်းချည့်နဲ့ခြင်း၊ သွေးဝမ်းသွားနေခြင်း စတဲ့ လက္ခဏာတွေ မရှိဘူးဆိုရင်တော့ သန်ချ-ဆေးကောင်းတလက်ကို ညွှန်ပြပေးပါမယ်။ ဒီနည်းကတော့ ပုတတ်စာဥကို အိမ်သုံးသကြားနဲ့ ရောစပ်၍ ဖြစ်စေ၊ သင်္ဘောသီးအစိမ်းကို ဆူးလေးတွေနဲ့ ဖောက်ထုတ်လို့ ထွက်ရှိလာတဲ့ အစေးဖြူလေးတွေနဲ့ဖြစ်စေ၊ ထန်းလျက်နဲ့ရောစပ်ပြီး တေ၍ ဆေးတရွေးမှ သုံးရွေးအထိ တိုက်ကျွေးပေးပါက သန်ကောင်တွေကို ကျဆင်းစေပါတယ်။
ကလေးချောင်းဆိုးပါက ချောင်းဆိုးရောဂါ ကုသဆေးအဖြစ် ကွမ်းရွက်ကို ထုထောင်း၍ ရသောအရည်ကို ဆေးတခွက်စာအဖြစ် ကလေးကို တိုက်ကျွေးရမှာက ဟင်းစားစတီးဇွန်း တဇွန်းထဲမှာ အိမ်သုံးဆား အနည်းငယ်ရောစပ်ပြီး တိုက်ကျွေးပေးပါ။ ကလေးငယ်ရင်တော့ လက်ဖက်စားဇွန်းတဇွန်း တိုက်ကျွေးပေး နိုင်ပါတယ်။ တနေ့ကို သုံးကြိမ် ဆေးကို ဆက်တိုက်နိုင်ပါတယ်။ လိုအပ်က ကလေးနှာပိတ်နေရင်တော့ ကုလား ရှိန်းခိုစစ်စစ် အနည်းငယ်ကို အုန်းဆီစစ်စစ်နဲ့ ဖျော်ပြီး ငယ်ထိပ်၊ နှာဝတို့ကို လိမ်းပေးပါ။ အုပ်ပေးပါ။ ကလေးအတွက်ကတော့ ဒီကုသနည်းနဲ့ လုံလောက်ပါတယ်။
*********************************************************************
(အဆုတ်ပြွန်ရောဂါ ကုသနည်း)
ယခုလို မိုးရာသီမှာ အဆုတ်ပြွန်ရောင်တတ်တဲ့ ရောဂါတွေနဲ့လည်း ကြုံတွေ့တတ်ကြပါတယ်။ အချို့ဆိုရင် အဆုတ်အအေးမိတာတို့၊ ၀က်သက်ရောဂါတို့၊ ကြက်ညှာချောင်းဆိုးရောဂါတို့၊ တုပ်ကွေးရောဂါ တို့တွေကြောင့်လည်း အဆုတ်ကို ထိခိုက်ပြီး အဆုတ်ပြွန်ရောင်ရောဂါတွေ ရတတ်ပါတယ်။
(အဆုတ်ရောင်ရောဂါ လက္ခဏာများ)
ဒီလိုအဆုတ်ရောဂါရပြီဆိုရင်တော့ ထင်ရှားတဲ့လက္ခဏာတွေ ပြတတ်ပါတယ်။ နှာရည်ယိုတတ်ပါတယ်။ နှာစေးလာတတ်ပါတယ်။ ပြင်းပြင်းထန်ထန် ချောင်းဆိုးလာတတ်ပါတယ်။ ရင်ကျပ်လာတတ်ပါတယ်။ အဓိကတော့ အသက်ရှူရှိုက်ရာမှာ လေသွင်းလေထုတ်ရာမှာ ခက်ခဲမှုတွေ တွေ့ကြုံရတတ်ပါတယ်။
(အဆုတ်ရောင်ရောဂါ ကုထုံးဓာတ်စာ)
အစာလည်းဆေး၊ ဆေးလည်းအစာ ဆိုသကဲ့သို့ ဆေးဟင်းလျာအဖြစ် ဖော်ပြလိုက်ပါတယ်။ ထိကရုံး(ရေ)ကို ကြက်သွန်နီ၊ ကြက်သွန်ဖြူ၊ ကန်စွန်းရွက်နဲ့ ကြော်စားပေးနိုင်ပါတယ်။ အဆုတ်ရောဂါအတွက် အစာအာဟာရကုထုံး ဖြစ်ပါတယ်။
သို့မဟုတ် ပုစွန်စာရွက်ကို ၀က်သားနဲ့ ကြော်စားပေးခြင်း၊ ဟင်းချက်စားပေးခြင်း၊ အကြော်ကို ရှောက်ချဉ်သီးရည်ညှစ်ပြီး စားပေးနိုင်ပါတယ်။ ရောဂါဖြစ်လာရင်တော့ ရောဂါကို ပျောက်ကင်းစေနိုင်မယ့် အစားအစာတွေကို ရွေးချယ်စားသောက်တဲ့ အစားအစာနဲ့ ဆေးပညာကဏ္ဍမှာ ဖွံ့ဖြိုးတိုးတက်မှုတွေ မြန်မာ့ရိုးရာဆေးပညာမှာ နှေးကွေးနေတာကို ပညာရှင်ကြီးတွေအနေနဲ့ ပြည်သူ့ကျန်းမာရေး တိုင်းရင်းဆေး ကဏ္ဍတွေ အတွက် ထည့်သွင်းစဉ်းစားသင့်ကြောင်း တင်ပြလိုက်ရပါတယ်။
(အဆုတ်ရောဂါ၊ အဆုတ်ပွရောဂါအတွက် အစာအာဟာရဓာတ်စာများ)
စားသုံးနည်းအညွှန်းကတော့ ပုစွန်စာရွက်ကို ငါးဥနဲ့ ကြော်စားပေးခြင်းအားဖြင့် အဆုတ်ရောင်ခြင်း၊ အဆုတ်ပွခြင်းအတွက် အစာအာဟာရ ကုထုံးဓာတ်စာအဖြစ် အသုံးဝင်ပါတယ်။
ဟင်းဂလာအယဉ်အပင်နဲ့ အရွက်တွေကို ငါးရှဥ့်ပနီသားနဲ့ ချက်စားလို့ရပါတယ်။ ဒါမှမဟုတ်ရင် ဂေါ်ရခါးသီးကို ငါးရှဥ့်ဖြူသားနဲ့ ချက်စားပေးနိုင်သလို ကြော်စားပေးပါက အဆုတ်ကြီးထွားခြင်းကို လျော့နည်းစေပါတယ်။
(ကျန်းမာရေးဝန်ကြီးဌာန၊ တိုင်းရင်းဆေးပညာဦးစီးဌာန၊ သုတေသနနှင့်ဖွံ့ဖြိုးရေးမှ ထုတ်ဝေသော တိုင်းရင်းဆေးခန်းသုံး ဆေးနည်းနှင့် ကုသနည်းများ)
တိုင်းရင်းဆေးခန်းသုံး ဆေးအမှတ်စဉ် (၆) ဟလိဒ္ဒစုဏ္ဏဆေးမှုန့် ငါးကျပ်သား၊ တိုင်းရင်းဆေးခန်းသုံး ဆေးအမှတ်စဉ်(၁) လေမှပုတိက သလိပ်ပုပ်ပျောက်ဆေး ဆေးမှုန့် ငါးကျပ်သားကို အထက်ပါဆေးနှင့် ရောစပ်ထားပါ။ လူကြီး ဆေးတခွက်စာပမာဏ ဆေးမှုန် ၂-ကျပ်သား၊ ကလေး ဆေးမှုန့် ၁-ပဲသားကို ကွမ်းရွက်စိမ်းကို ထုထောင်း၍ ရရှိသောအရည်နဲ့ဖြစ်စေ၊ ရှောက်ချဉ်သီးညှစ်၍ ရရှိသော အရည်နြဲ့ဖစ်စေ သောက်ပေးနိုင်ပါတယ်။
ကွမ်းရွက်စိမ်းရည်နဲ့ သောက်မယ်ဆိုရင် ဟင်းစားစတီးဇွန်းတဇွန်းနဲ့ ဆေးမှုန့်ကို ရေးစပ်ပြီး တိုက်ကျွေးပေးရပါတယ်။ ဆေးကို တနေ့သုံးကြိမ်အထိ တိုက်ပေးနိုင်ပါတယ်။ ရှောက်ချဉ်သီးညှစ်တဆ၊ ပျားရည်တဆနဲ့ ရောစပ်ပြီးတော့ ရရှိတဲ့အရည် ဟင်းစားစတီးဇွန်းတဇွန်းနဲ့ ဆေးမှုန့်တခွက်စာကို ရောစပ်ပြီးတော့ တိုက်ကျွေးနိုင်ပါတယ်။ ဆေးကို တနေ့သုံးကြိမ် တိုက်ကျွေးနိုင်ပါတယ်။
(ကစော့ခါးနှင့် မုရားကြီးရွက်ကုထုံး)
မုရားကြီးရွက်နဲ့ ကစော့ခါးပင်ဟာ လုတိုင်းလိုလို သိထားကြတဲ့ အပင်တွေလည်း ဖြစ်ပါတယ်။ အဲဒီအပင် နှစ်ပင်ကတော့ အဆုတ်နဲ့ပတ်သက်တဲ့ ရောဂါတွေအတွက် ကမ္ဘာ့တိုင်းရင်းဆေးလောကမှာ အသုံးများတဲ့ အပင်တွေလည်း ဖြစ်ကြပါတယ်။ ဒီဆေးဖက်ဝင် အပင်နှစ်မျိုးစလုံးကို ဆေးဝါးဖော်စပ်နည်း စံချိ်န်စံညွှန်းနဲ့သာ အသုံးပြုနိုင်ကြမယ်ဆိုရင်တော့ အခြားဆေးပင်တွေကို သုံးစရာမလိုတော့ပါဘူး။
မုရားကြီးကိုပဲဖြစ်စေ၊ ကစော့ခါးရွက်ကိုပဲဖြစ်စေ ရှေ့ပိုင်းမှာ ဖော်ပြခဲ့ပြီးဖြစ်သော ဆေးပြုတ်ရည်နည်း အတိုင်း အသုံးပြုပြီး ကုသနိုင်ပါတယ်။ ပြုတ်ဆေးရည်ဆိုရာမှာလည်း ဆေးဖက်ဝင်တပင်ကိုပဲ ပြုတ်သောက် ရမှာ ဖြစ်ပါတယ်။ ကြိုက်နှစ်သက်ရာ ရရာအပင်တွေကို ပြုတ်သောက်နိုင်ပါတယ်။ လူကြီး ဆေးတခွက်စာ ပမာဏမှာ ဟင်းစားစတီးဇွန်းနဲ့ တဇွန်းဖြစ်ပြီး အိမ်သုံးသကြား အနည်းငယ်ကို ရောစပ်ပြီး တကြိမ် တိုက်ကျွေးနိုင်ပါတယ်။ ဒီဆေးကို နံနက်တကြိမ် နေ့လယ်တကြိမ် ညတကြိမ်စီ တိုက်ကျွေးနိုင်ပါတယ်။ ကလေးဆေးညွှန်းကတော့ ဟင်းစားစတီးဇွန်းနဲ့ ထက်ဝက်ဖြစ်ပြီး အထက်ပါ ဆေးတိုက်ကျွေးနိုင်တဲ့အတိုင်း တိုက်ကျွေးပေးပါ။ ပျောက်ကင်းလွယ်တဲ့ဆေးနည်းပါပဲ။
(မိုးရာသီတွင် အထူးဖြစ်လေ့ရှိသည့် ၀မ်းကိုက်ရောဂါ)
မိုးရာသီတွင် ဖြစ်ပွားလေ့ရှိကြတဲ့ ရောဂါတွေဇယားမှာ ၀မ်းကိုက်ရောဂါအကြောင်းလည်း ပါဝင်ပါတယ်။ ၀မ်းကိုက်ရောဂါမှာလည်း ချွဲဝမ်းကိုက်ရောဂါနဲ့ သွေးဝမ်းကိုက် ဆိုပြီးတော့ တိုင်းရင်းဆေးပညာမှာ သတ်မှတ်ထားတာတွေ ရှိပါတယ်။ ယခုဆောင်းပါးမှာတော့ မိုးရာသီတွင် ဖြစ်ပွားတတ်တဲ့ ရောဂါအကြောင်းကို တင်ပြနေရတဲ့အချိန်လည်း ဖြစ်ပြန်၊ ရောဂါတွေကလည်း များပြားနဲ့ စာမျက်နှာအတွက် ချန်လှပ်ရေးသားနေရတဲ့ အကြောင်းတွေကြောင့် အကျယ်တ၀င့်ဖော်ပြခြင်း မပြုနိုင်တာကို ခွင့်လွှတ်စေချင်ပါတယ်။ ဒီမဂ္ဂဇင်းမှာပဲ ရောဂါတမျိုးချင်းရဲ့ ရောဂါဖြစ်စဉ်၊ ရောဂါလက္ခဏာ၊ ရောဂါစစ်တမ်းနဲ့ ကုသနိုင်တဲ့ဆေးနည်းတွေ၊ စားသောက်ရမယ့် အစားအစာတွေ ထပ်မံ ရေးသားတင်ပြ ပါဦးမယ်။
စာရေးသူ ရေးသားထုတ်ဝေပြီး တိုင်းရင်းဆေးကျမ်းစာအုပ်(၅)အုပ်ထဲမှ အချို့တ၀က်ကို ပြောက်ကျားစနစ်နဲ့ ရေးသားခဲ့တဲ့ စာအုပ်တွေထဲမှာ ဖတ်ရှုကုသနိုင်ပါတယ်။ ဒီမဂ္ဂဇင်းမှာတော့ တိုင်းရင်းဆေးပညာနဲ့ ပတ်သက်ပြီး အထူးဆောင်းပါးအဖြစ် ပြည့်စုံသည်ထက် ပိုမိုတိကျမှန်ကန်မှု ရရှိစေချင်တဲ့ စေတနာတွေနဲ့ မဂ္ဂဇင်းအယ်ဒီတာချုပ် ဦးအောင်မြတ်နဲ့ မဂ္ဂဇင်းအမှုဆောင်တွေရဲ့ တိုက်တွန်းအားပေးမှုကြောင့် အထူး ဦးစားပေးရေးသားပါကြောင်းကို ရိုးသားစွာ ၀န်ခံတင်ပြလိုက်ရပါတယ်။
( ၀မ်းကိုက်ရောဂါ ကုထုံး)
ဤရောဂါသည် မိုးရာသီတွင် အဖြစ်များပါသည်။ အပူလွန်သော ၀မ်းမီးကြောင့် ဖြစ်သည်ဟု မြန်မာ့ရိုးရာ တိုင်းရင်းဆေးပညာတွင် ညွှန်ပြထားပါတယ်။ ကုထုံးဆေးချက်အရ အစာအာဟာရ ဓာတ်စာအဖြစ် ကုသနိုင်ပါပေတယ်။ အစာအာဟာရမှာ ပြောင်းဖူးမီးဖုတ်ကို စားပေးခြင်းဖြင့် ပျောက်ကင်းလွယ်စေပါတယ်။
သို့မဟုတ် ထားဝယ်မှိုင်းရွက်ကို သုပ်စားပေးနိုင်ပါတယ်။ ဒါမှမဟုတ်ရင် တို့မြှုပ်စရာအဖြစ်လည်း စားပေးနိုင်ပါတယ်။ ထားဝယ်မှိုင်းရွက်ကို ငါးမြွေထိုးခြောက်ကိုပြုတ်၍ သုပ်စားပေးနိုင်ပါတယ်။ ကျောက်ဖရုံသီးကို စားပေးခြင်းဖြင့်လည်း ပျောက်ကင်းသက်သာစေပါတယ်။
ပဲပြားစေ့၊ ပဲသီးကို ငါးခူဖြင့် ချက်စားပေးပါ။ ဒါမှမဟုတ်ရင် ငါးပနော်နဲ့ ပဲပြားသီး၊ ပဲပြားစေ့ကို ချက်စားပေးခြင်းဖြင့် ရောဂါဝေဒနာကို ပျောက်ကင်းစေနိုင်ပါတယ်။ သို့မဟုတ် အစာအာဟာရ ဓာတ်စာအနေနဲ့ ရဲယိုရွက်နဲ့ ဒန့်သလွန်ရွက်ရောစပ်ပြီး ကြော်စားပေးပါ။ နောက်တနည်းကတော့ သံပုရာသီးကို အလုံးလိုက်မှ ရရှိတဲ့ အသီးအရည်နဲ့ ငါးရှည့်ပနီသား ကြော်ပြီးသားကို ဖျန်းစားပေးပါ။
ဝမ်းကိုက်ရောဂါအတွက် အစာလည်းဆေး၊ ဆေးလည်းအစာ ဆိုတဲ့ ဆောင်ပုဒ်အတိုင်း တိုင်းရင်းဆေး သမားတော်ကြီးများမှ သတ်မှတ်ပေးထားတဲ့ အစာအာဟာရဓာတ်စာတွေ အကြောင်းကို ဆက်လက်တင်ပြ ပါဦးမယ်။ ဖတ်ရှုကြည့်ကြပါ။
၁။ ဟင်းဂလာယဉ်နဲ့ ငါးမြွေထိုးကို ချက်စားပေးပါက သွေးဝမ်းကိုက်ရောဂါကို ပျောက်ကင်းစေနိုင်တဲ့
အစာအာဟာရကုထုံး ဓာတ်စာအဖြစ် အသုံးဝင်စေပါတယ်။
၂။ ကြက်ဆူရိုးနီကို ရေနွေးဖျော၍ ငါးမြွေထိုးကင်နဲ့ သုပ်စားပေးပါ။
၃။ ကြက်ဟင်း ခါးသီးကို ငါးရှဥ့်ပနီကင်ထွင်၍ ဆီးဖြူသီးနဲ့ ကြော်စားပါ။
၎။ ဆင်ခရမ်းသီးနဲ့ ငါးမြွေထိုးသားကို ချက်စားပေးပါက ၀မ်းကိုက်ရောဂါအတွက် ပျောက်ကင်းစေနိုင်သည့် အစာအာဟာရ ဓာတ်စာ ဖြစ်ပါတယ်။
၅။ ကြက်သွန်နီကို ထန်းလျက်ဖြင့် ကြော်စားပေးပါက အပျောက်မြန်ဆန်ပါသည်။
၆။ ကောက်ရိုးနွယ်ကို ငါးရံ့နဲ့ ချက်စားပေးပါက ၀မ်းကိုက်ရောဂါကို သက်သာပျောက်ကင်းစေနိုင်တယ်။ သို့မဟုတ် ငါးခူနဲ့ ကောက်ရိုးနွယ်ကို ချက်စားပေးပါ။ ပုစွန်တုပ်ကြီးနဲ့ ကောက်ရိုးနွယ်ကို ချက်စားပေးပါက ပျောက်ကင်းစေနိုင်တယ်။ ဒါမှမဟုတ်ရင် ကောက်ရိုးနွယ်ကို ငါးရှဥ့်ဖြူသားနဲ့ ချက်စားပေးပါက ၀မ်းကိုက်ရောဂါကို ပျောက်ကင်းစေနိုင်ပါတယ်။
နောက်တနည်း---
၁။ ကင်းပွန်းချဉ်ရွက်ကို ငါးမြွေထိုးကင်နဲ့ ချက်စားပေးနိုင်ပါတယ်။
၂။ ငါးဖယ်နဲ့ ကင်ပွန်းချဉ်ကို ချက်စားပေးနိုင်ပါတယ်။
၃။ ငါးသလောက်နဲ့ ကင်ပွန်းချဉ်ကို ချက်စားပေးနိုင်ပါတယ်။
၎။ ကင်ပွန်းချဉ်ကို ငါးရှဥ့်ကင်နဲ့ ချက်စားပေးနိုင်သလို ကြော်လည်းစားနိုင်ပါတယ်။
၅။ ကင်ပွန်းချဉ်ကို ပုစွန်ကပ်နဲ့ ချက်စားပေးပါ။
၆။ ကျောက်ဖရုံသီးကို ငါးမြွေထိုးကင်နဲ့ ချက်စားပေးပါ။
၇။ ငါးမြွေထိုးကင်ကို ချင်းတက်ပါးပါးလှီးဖြတ်ပြီး ကြော်စားပေးပါ။
၈။ ငါးကင်နဲ့ ချင်းတက်ကို ကြော်စားပေးပါ။
၉။ ချဉ်ပေါင်ခါးနဲ့ဖြစ်စေ၊ ချဉ်ပေါင်ဖြူနဲ့ဖြစ်စေ၊ ချဉ်ပေါင်နီနဲ့ဖြစ်စေ၊ ပုစွန်ကို ချက်စားပေးပါက
သက်သာပျောက်ကင်းမှုကို မြန်ဆန်စေပါတယ်။
၁၀။ ငါးခူကို ချဉ်ပေါင်ခါးနဲ့ ဖြစ်စေ၊ ချဉ်ပေါင်ဖြူနဲ့ဖြစ်စေ၊ ချဉ်ပေါင်နီနဲ့ဖြစ်စေ ချက်စားပေးပါ။
ပျောက်ကင်းမှုကို မြန်ဆန်စေပါတယ်။
၁၁။ ငါးမြွေထိုးကို ခွေးတောက်ရွက်နဲ့ ပြုတ်၍ ကြော်စားပေးပါ။
ဤအစာအာဟာရ ဓာတ်စာများသည် ပိတ်ဝမ်းကိုက်ရောဂါ (ချွဲဝမ်းကိုက်ရောဂါ) သွေးဝမ်းကိုက်ရောဂါ တို့အတွက် ဆေးဟင်းလျာများ ဖြစ်ကြပါတယ်။
(သွေးဝမ်းကိုက်ရောဂါကုထုံး)
သွေးဝမ်းကိုက်ရောဂါ သို့တည်းမဟုတ်-အပူဝမ်းကိုက်ရောဂါသည် ရာသီဥတု၏ အပူဒဏ်၊ ကမ္မ၏အပူဒဏ်၊ အစာအာဟာရ၏ အပူဒဏ်များ စုဝေးကာ ငုပ်စေ၍ ခန္ဓာကိုယ်တွင်း လောင်မြိုက်သဖြင့် သွေးဝမ်းကိုက်တတ်သည်။ ဤရောဂါဝေဒနာကို မြန်မာ့ရိုးရာ တိုင်းရင်းဆေးပညာအရ ဥဏှတေဇော လွန်ငုပ်ခြင်းကြောင့် ဖြစ်၏။ ဤရောဂါကုထုံးအတွက် သစ်သီးဝလံများဖြင့် ကုသနိုင်၏။ ယင်းကုထုံးမှာ မင်းကွတ်သီးခွံကိုပြုတ်၍ တိုက်ကျွေးခြင်းဖြင့် ရောဂါဝေဒနာကို ပျောက်ကင်းစေနိုင်ပေသည်။
နောက်ထပ်ကုထုံးတရပ်မှာ သံပုရာရည်ကို အိမ်သုံးသကြား ချိုချိုနှင့်ရောစပ်ကာ တိုက်ကျွေးခြင်းဖြင့် ရောဂါဝေဒနာကို ပျောက်ကင်းစေနိုင်ပါတယ်။
ဤရောဂါကုထုံးအတွက် အစာအာဟာရဓာတ်စာအနေနဲ့ ကုသမှုနည်းမှာ သလဲသီးဖျော်ရည်တွင် အိမ်သုံးသကြား ချိုချိုထည့်ပြီး တိုက်ကျွေးခြင်းဖြင့် ရောဂါဝေဒနာကို သက်သာပျောက်ကင်းစေနိုင်ပါတယ်။
(ပိတ်ဝမ်းကိုက် ရောဂါ)
စားသုံးနည်းအညွှန်း---
ထိကရုံးရွက်ကိုကြော်၍ ဖြစ်စေ၊ ချက်ပြုတ်၍ဖြစ်စေ၊ အစိမ်းအတိုင်း တို့မြှုပ်၍ဖြစ်စေ၊ ဟင်းချက်၍ဖြစ်စေ သို့တည်းမဟုတ်-အရွက်စိမ်းကို ထုထောင်း၍ ရရှိသောအရည်များကိုဖြစ်စေ သောက်စားပေးခြင်းဖြင့် ပိတ်ဝမ်းရောဂါကို ပျောက်ကင်းစေနိုင်ပါသည်။
သို့တည်းမဟုတ်-ထိကရုံး (ရေ)ကို ကြက်သွန်နိုင်နိုင်ဖြင့် ကြော်စားပေးခြင်းဖြင့် ပျောက်ကင်းနိုင်ပါတယ်။
၁။ ထမင်းခဲကို မီးဖုတ်၍ ရေနှင့်ဖျော်ပြီး အရည်ကို သောက်ပေးပါ။
၂။ ကြက်သားစွပ်ပြုတ်ရည်ကို သောက်ပေးပါ။
၃။ ကြက်သားပြုတ်ကြော်ကို စားပေးပါ။
၎။ ငှက်ပျောသီး ဖီးကြမ်းကို မီးဖုတ်ပြီးဖြစ်စေ၊ မီးကင်ပြီးဖြစ်စေ ကျွေးပေးနိုင်ပါတယ်။
( ကျန်းမာရေးဝန်ကြီးဌာန၊ တိုင်းရင်းဆေးပညာဦးစီးဌာန၊ သုတေသနနှင့် ဖွံ့ဖြိုးရေးမှ ထုတ်ဝေသော တိုင်းရင်းဆေးထန်းသုံး ဆေးဝါးများ အမှတ်စဉ်အညွှန်း)
ဤရောဂါအတွက် တိုင်းရင်းဆေးခန်းသုံး အမှတ်စဉ်(၈) သွေးဒူလာဆေးမှုန့် ငါးကျပ်သားနဲ့ တိုင်းရင်းဆေးခန်းသုံး ဆေးအမှတ်စဉ်(၂) လေမျိုး ၈၀-ဆေး ဆေးမှုန့် ငါးကျပ်သားကို အထက်ပါ ဆေးမှုန့်များနဲ့ သမစေရန် ရောနှောထားပါ။ လူကြီး ဆေးတခွက်စာ ပမာဏ တကြိမ် ဆေးမှုန့် ၂-ပဲသားကို ရေနွေးနဲ့တိုက်ပါ။ တနေ့ သုံးကြိမ် တိုက်ကျွေးနိုင်ပါတယ်။ ကလေးများအတွက် ဆေးတခွက်စာ ၁-ပဲသားကို အထက်ပါအညွှန်းအတိုင်း တိုက်ကျွေးကုသနိုင်ပါတယ်။
မိုးရာသီ၌ဖြစ်တတ်သော ရောဂါများအတွက် အတတ်နိုင်ဆုံး သုံးစွဲလွယ်ကူမည့် ကုသနည်းများကို စုံလင်စွာ ဖော်ပြ ရေးသားခဲ့ပြီး ဖြစ်ပါသည်။ သင်နှင့် သင့်ပတ်ဝန်းကျင်များအတွက် တိုင်းရင်းဆေးပညာဖြင့် ကုသမှု၊ ဇီဝိတဒါန ပြုလိုကြသူများအတွက် သင့်မိသားစု စာအုပ်စင်တွင် ဤမဂ္ဂဇင်းအား ထာဝရသိမ်းဆည်းထား စေခြင်းအားဖြင့် သင့်မိသားစုအတွက် ကုန်ကျမှုစရိတ် သက်သာစွာနှင့် ကျန်းမာစေခြင်း၊ အသက်ရှည် စေခြင်း၊ ရောဂါဘယကင်းစွာနှင့် ဘ၀ကို ရပ်တည်နိုင်သည့် အကျိုးကျေးဇူးကို မဟိဒ္ဓိမဂ္ဂဇင်းမှ ပေးဆပ်နိုင်လိမ့်မည်ဖြစ်ကြောင်း တင်ပြရင်းဖြင့်သာ။
ကျော်တင့်ဆွေ
(မဟိဒ္ဓိမဂ္ဂဇင်း ၂၀၀၈-စက်တင်ဘာလ)
No comments:
Post a Comment