ကျန်းမာရေး အထောက် အကူပြု ငှက်သိုက်

မြန်မာ အဘိဓာန် အကျဉ်းချုပ် အတွဲ(၁)တွင် ငှက်သိုက်ကို ဇီဝဇိုး ငှက်ငယ်၏ အသိုက် အားဆေး အဖြစ် သုံးစွဲရ သည်။ ဇီဝဇိုးသည် အသိုက်ကို မိမိ အန်ဖတ်ဖြင့် ပြုလုပ်လေ့ရှိ၏။ ထိုငှက်၏ အသိုက်ကို ''ငှက်သိုက်''ဟု ခေါ်ကြ သည် ဟူ၍ ဖွင့်ဆို ထားပါသည်။

ငှက်သိုက်ကို လူသူ အရောက်အပေါက် နည်းသော ပင်လယ် ကျွန်းများရှိ သဘာဝ အလျောက် ဖြစ်ပေါ်နေ သည့် ကျောက်တောင် ကြီးများ၏ ကျောက်လိုဏ်ဂူ နံရံများ၊ ကမ်းပါးယံ ကျောက်စွန်း၊ ကျောက်ခွက် များတွင် ခက်ခက် ခဲခဲ ရှာဖွေဆွတ်ခူး စုသိမ်းရသည်။

ငှက်သိုက်ဖြူနှင့် ငှက်သိုက်မည်း နှစ်မျိုးရှိသည်။ ငှက်သိုက်ဖြူသည် ဖြူဖွေး ဝင်းမွတ်နေပြီး အညစ်အကြေး သန့်ရှင်း ခြင်း၊ အမှိုက်သရိုက် ကင်းစင်ခြင်း၊ ခြောက်သွေ့ လတ်ဆတ်ခြင်း၊ အသိုက်ပုံ သဏ္ဌာန် မပျက်ခြင်း၊ အငန်ဓာတ်၊ အစိုဓာတ် လုံးဝ မရှိခြင်း တို့ကြောင့် တန်ဖိုး ကြီးမားသည်။ ငှက်သိုက် မည်းတွင် ငှက်မွေးအမျှင် အနည်းငယ် ရှုပ်ထွေးနေပြီး အရောင်လည်း မည်းနက်သည်။ ငှက်သိုက် အချို့တွင် ပန်းနုရောင် သန်းလျက် ရှိသည်ကိုလည်း တွေ့ရတတ်သည်။ ဇီဝဇိုးငှက်တို့ အသိုက်လုပ်စဉ် အာခေါင် အတွင်းမှ အချွဲစေး၊ အချွဲမျှင်များ ထွေးအန်ရဖန်များ သောအခါ သွေးစ သွေးနများ ပါရှိခြင်းကြောင့်ဟု ဆိုပါသည်။

ငှက်သိုက်၏ အရောင်မှာ အဖြူ ဖြစ်သော်လည်း တစ်နှစ်ခန့် ကြာလျှင် အညိုရောင် သန်းလာသည်။ ငှက်သိုက်မှာ ဖယောင်းချက်နှင့် တူသည်။ လတ်ဆတ်သော ငှက်သိုက် အနံ့မှာ ငှက်ကိုယ်နံ့မျှသာ ညှီစို့စို့ရသည်။ ရက်အနည်း ငယ်အတွင်း ထိုအနံ့ ပျောက်ပြယ် သွားတတ်သည်။ ငှက်သိုက် အစိမ်းစားလျှင် ရေဆာ၊ ထမင်းဆာ ဆာလောင်မှု ဟူသမျှ ပြေသည်။ မောပန်းနွမ်းနယ်မှု ဟူသမျှ ချက်ချင်းပျောက်သည်။ အားအင် ကုန်ခန်းမှု အလျင်အမြန် ပြန်ပြည့် သည်။

ငှက်သိုက်သည် အဖိုးတန် ရှားပါးသော ဆေးဖက်သုံး ပစ္စည်း ဖြစ်သဖြင့် ရွှေနှင့်စက်၍ ဝယ်ယူ ကြသည်ဟု သိရ သည်။ အရသာ ကောင်းမွန်ခြင်း၊ အာဟာရ ပြည့်ဝခြင်း တို့ကြောင့် အင်အားကုန်ခန်း နေသူများနှင့် လူမမာ များအတွက် အားဆေးအဖြစ် အသုံးချရန် အထူး သင့်လျော်သည်။ ဟောင်ကောင်၊ စင်ကာပူ၊ ပီနန် တို့တွင် ငှက်သိုက်ကို ''အား''အလို့ငှာ ဟင်းချက်စားသည်။

ငှက်သိုက်တွင် ပရိုတင်းဓာတ် ကြွယ်ဝပြီး ဟော်မုန်းနှင့် အခြား အာဟာရဓာတ် များစွာ ပါဝင်သဖြင့် နာတာရှည် ရောဂါရှိသူများ၊ သက်ကြီးရွယ်အိုများ၊ အင်အား ကုန်ခန်း သူများကို ကျွေးလေ့ရှိသည်။ နှလုံးတုန်၊ ရင်တုန် အနာ၊ လေသလိပ် အနာ၊ ရင်တွင်း ဆာလောင် မွတ်သိပ်အနာကို ပျောက်ကင်း ချမ်းသာစေ၍ အိုမင်းမစွမ်း ခွန်အား ယုတ်လျော့ သူတို့အတွက် သင့်လျော်သည်။ အထူးသဖြင့် နှလုံး၊ ဦးနှောက်၊ သည်းခြေရောဂါ ရှိသူများ မှီဝဲသင့် သည်။ ကိုယ်ဝန်ဆောင် မိခင်လောင်းများနှင့် ကလေးသူငယ်များ စားလျှင် ကျန်းမာရွှင်လန်းပြီး ရောဂါ အထူးထူးမှ ကင်းဝေး သည်။

သဘာဝ ငှက်သိုက်ကို ခေတ်မီ နည်းစနစ်ဖြင့် သန့်စင်ထားသော ငှက်သိုက်ရည်ကို ဆေးဖက်ဝင် အခြားပစ္စည်း များနှင့် ပေါင်းစပ် ဖော်ထားသဖြင့် အဆုတ်ကို အားကောင်းစေပြီး အအေးမိ ချောင်းဆိုး၊ တုပ်ကွေး ရောဂါများကို သက်သာ ပျောက်ကင်းစေသည်။

ငှက်သိုက်ကို ရေစိမ်၍ နှစ်နာရီခန့် ကြာလျှင် အမျှင်များ ပွတက်လာသည့် အခါ အမွေးအမှင် ငယ်ကလေးများနှင့် အမှိုက်များ ကပ်နေပါက ဇာဂနာ ညှပ်ဖြင့် ဖယ်ရှားရသည်။ သကြားခဲသင့် ရုံထည့်ပြီး ရေနွေးနွေးဖြင့် ပေါင်းထားသော ငှက်သိုက်ပေါင်းကို စားလျှင် ရင်တွင်းအေးကာ အင်အား အလုံးစုံ ချက်ချင်း ပြန်ပြည့်လာသည်။ ငှက်သိုက်ပေါင်း သည် နှလုံးရောဂါ ရှိသူများ၊ နှလုံးတုန် ရင်ခုန်ခြင်း၊ မောပန်းခြင်း၊ အသက်ရှူ မဝခြင်းတို့ကို လက်နှင့် ယူပစ်သ လို ပျောက်ကင်းစေပါသည်။

ဆီးနီ၊ ဆီးနည်း၊ ဆီးကျင်၊ ဆီးအောင့်လျှင် ငှက်သိုက်ကို ရေစိမ်၍ သောက်ရသည်။ နွားနို့စစ်စစ် ၅ဝ ကျပ်သားတွင် ဇာတိပ္ဖိုလ်သီး တစ်လုံးကို ကုန်အောင်သွေးပြီး မီးတွင်ကျို၊ နွားနို့ခန်း ခြောက်ခါနီးလျှင် လေးညှင်းမှုန့် တစ်ပဲသား၊ သည်းခြေ ရွှေဆေးရှစ်ပဲသား၊ ဂလူးကို့စ် သကြား ရှစ်ပဲသားနှင့် ငှက်သိုက်အမှုန့် တစ်ကျပ်သား သမအောင် ရောမွှေပါ။ ထိုဆေးကို လက်ဖက်ရည် တစ်ဇွန်းခန့် နံနက်ည တစ်ကြိမ်စီ ကျွေးလျှင် ကလေးငယ်များ ပိန်လှီခြင်း၊ မကြာခဏ ဝမ်းပျက်ခြင်း၊ အားနည်း အဖျားဝင်ခြင်းတို့ ပျောက်ကင်းပြီး ကျန်းမာဝဖြိုး စေနိုင်ပါသည်။

ငှက်သိုက်ကို သံဒယ်အိုးဖြင့် မီးသင်းပြီး အမှုန့်ပြု၍ ပုလင်းတွင် လေလုံလုံ ထားပါ။ ငှက်သိုက်မှုန့်သည် ဓားရှ၊ လံှရှ၊ ထိခိုက်ပွန်းပဲ့ အနာများကို လျင်မြန်စွာ အနာကျက်စေသည်။ ဖက်ခွက်နာ၊ ယားနာများတွင် ထည့်လျှင် လျင်မြန်စွာ အနာ ပျောက်သည်။

ငှက်သိုက်ကို သက်ဆိုင်ရာ ဆေးဖက်များဖြင့် ရောနှောစပ်ပြီး တစ်နှစ်တစ် ကြိမ်စားပေးခြင်း အားဖြင့် အနာရောဂါ ကင်းရှင်းပြီး ကျန်းမာ သန်စွမ်းသည်ဟု တရုတ်လူမျိုး တို့က ယုံကြည်ကြသည်။ ဇီဝဇိုး ငှက်သည် အခြားငှက် တို့နှင့် ရောနှောမနေ သီးသန့် နေထိုင်လေ့ ရှိသောကြောင့် ငှက်ရောဂါဘယ ကူးစက်မှု မရှိခြင်း၊ ကောင်းကင်ယံထဲ ပျား ကောင်၊ ပိုးကောင်ကိုသာ ထိုးသုတ် စားသောက်ခြင်း၊ ၎င်း၏အာခေါင်မှ အချွဲစေးမျှင် (အန်ဖတ်)နှင့် အသိုက် ပြုလုပ်ခြင်း ဓလေ့တို့ကြောင့် ငှက်သိုက်၌ သဘာဝ အစွမ်းထက်မ ှုရာနှုန်းမြင့်မားသည်။

သို့ပါ၍ အစာလည်းဆေး၊ ဆေးလည်းအစာ ဖြစ်သော သဘာဝ အားဆေး ငှက်သိုက်ကို လူကြီးလူငယ် မရွေး မှီဝဲပေးသင့် ပါကြောင်း ကျန်းမာသုတ အဖြစ် ရေးသားတင်ပြ လိုက်ရပါသည်။